Val á búnaði

Gott að hafa í huga

Við val á hraðhleðslustöð fyrir atvinnubílaflota er mikilvægt að hafa nokkra lykilþætti í huga. Skoðaðu eftirfarandi atriði til að tryggja val á hentugri hraðhleðslustöð:

• Hleðslugeta: Athugaðu afl hleðslustöðvarinnar og hve hratt hún getur hlaðið ökutækin þín. Þú þarft að ákveða hvort hún hentar fyrir þínar þarfir út frá stærð og gerð ökutækjanna.
• Staðsetning: Hvar er hraðhleðslustöðin staðsett? Góð staðsetning getur dregið úr biðtíma og aukið skilvirkni.
• Samhæfni: Gakktu úr skugga um að hleðslustöðin samhæfist hleðslutengi bílaflotans. Langflestir bílar á Íslandi nota CCS2 en þó eru nokkrar gerðir sem nota CHAdeMO (aðallega Nissan Leaf).
• Kostnaður: Skoðaðu uppsetningar- og rekstrarkostnað hraðhleðslustöðva til að meta heildarkostnað.
• Framtíðarsýn: hugaðu að framtíðarþörfum þegar ráðist er í framkvæmdir við hleðsluinnviði. Ef rafbílum mun fjölga á næstu árum er ágætt að gera ráð fyrir stækkun á heimtaug og fleiri hleðslustæðum.

Myndbandið hér fyrir neðan sýnir fjölbreyttar hleðslulausnir fyrir mismunandi tegundir ökutækja.

Fróðleikur

Af hverju hleður bíllinn ekki hraðar?

Allar rafhlöður nota jafnstraum (DC) en flutnings- og dreifikerfi raforku er byggt upp á riðstraumi (AC). Til að geta hlaðið rafbíla þarf því að breyta riðstraumi (AC) yfir í jafnstraum (DC) sem er gert með aflbreytum.

Allir rafbílar eru með innbyggðar aflbreytur sem eru notaðar þegar stungið er í samband við 22 kW heimahleðslustöð, flestir rafbílar eru þó einungis með 11 kW innbyggða aflbreytu.

Þegar hlaðið er í hraðhleðslustöð á jafnstraumi (DC) er margt sem getur haft áhrif á hleðsluhraða en ágætt er að hafa í huga að afl samanstendur af:

Spenna (V) * Straumur (A) = Afl (kW)

• Spenna (V) rafhlöðu: Flestar rafhlöður í fólksbílum eru 400V en 600V-800V í stærri ökutækjum og mörgum nýjum rafbílum. Hærri spenna eykur hleðsluhraða umtalsvert, t.d. er bíll á 400V spennu hlaðinn á 300A getur aflið mest farið í 400V*300A = 120 kW. Ef bíllinn væri hins vegar 800V tvöfaldast aflið í 800V*300A=240kW
• Straumur (A): Flestar hraðhleðslustöðvar geta hlaðið á bilinu 150A-500A. Ef hleðslustöðin sjálf er nógu öflug getur kapallinn verið flöskuháls, en með hærri straumi eykst hitamyndun og því þurfa 500A kaplar að vera vökvakældir. Mesta afl sem hægt er að ná með CCS2 er 400 kW (800V * 500A).
• Hleðsluferill: Misjafnt er eftir framleiðanda og tegund bíls hversu miklu afli rafhlaðan tekur við. Yfirleitt er mestur hraði þegar lítið er á rafhlöðunni en fer svo lækkandi með aukinni hleðslu. Hægt er að sjá hleðsluferil (charge curve) fyrir suma bíla inn á EV Database.
• Hitastig rafhlöðu: Köld rafhlaða tekur ekki við eins miklu afli og rafhlaða, þess vegna er mikilvægt að forhita rafhlöðuna áður en komið er á hraðhleðslustöð.